27న యాదగిరిగుట్టలో తెలంగాణ ఉద్యమకారుల ఫోరం
ఆవిర్భావ దినోత్సవ వేడుకలు
వాస్తవ గమ్యం / తెలంగాణ / ఆసిఫాబాద్ : తెలంగాణ ఉద్యమకారుల ఫోరం 9వ ఆవిర్భావ దినోత్సవ వేడుకలను ఈ నెల 27న యాదగిరిగుట్టలో ఘనంగా నిర్వహించనున్నట్లు ఫోరం రాష్ట్ర కో-కన్వీనర్ దుర్గం రవీందర్, నియోజకవర్గ కన్వీనర్ అజ్మీర బాబురావు తెలిపారు. రెబ్బెన మండలంలోని గోలేటిలో శుక్రవారం గోడపత్తులు ఆవిష్కరించి అనంతరం మాట్లాడుతూ తెలంగాణ రాష్ట్ర సాధన కోసం ఉద్యమకారులు చేసిన పోరాటాలు, త్యాగాలను స్మరించుకోవడంతో పాటు వారి సమస్యలు, హక్కులు, సంక్షేమంపై కార్యక్రమంలో చర్చించనున్నట్లు పేర్కొన్నారు. ఉద్యమకారులను గుర్తించి సంక్షేమ చర్యలు చేపట్టేందుకు ప్రభుత్వం ఏర్పాటు చేసిన కమిటీ కాలయాపన లేకుండా చర్యలు తీసుకోవాలని కోరారు. ఫోరం తొమ్మిదేళ్లుగా ఉద్యమకారుల సమస్యల పరిష్కారం కోసం పలు కార్యక్రమాలు నిర్వహిస్తోందన్నారు. వేడుకలకు రాష్ట్రంలోని వివిధ జిల్లాల నుంచి ఉద్యమకారులు, ఫోరం నాయకులు, ప్రతినిధులు హాజరుకానున్నారని తెలిపారు. కార్యక్రమాన్ని విజయవంతం చేసేందుకు ఉద్యమకారులు, ప్రజలు పెద్ద సంఖ్యలో పాల్గొనాలని పిలుపునిచ్చారు. కార్యక్రమంలో తోట లక్ష్మణ్, బోగే ఉపేందర్, రాయిల్ల నర్సయ్య పాల్గొన్నారు.
Reporter
వాస్తవ గమ్యం
మరిన్ని వార్తలు
Developed By :
