ప్రభుత్వ నిర్లక్ష్యం వల్లే పసికందుల మృతి – బాధిత కుటుంబాలను వెంటనే ఆదుకోవాలి
రిమ్స్‌లో జరిగిన ఘటనపై సమగ్ర విచారణ జరపాలి..
వాస్తవ గమ్యం / తెలంగాణ / ఆసిఫాబాద్ : రిమ్స్‌లో జరిగిన ఘటనపై సమగ్ర విచారణ జరిపి బాధ్యులపై చర్యలు తీసుకోవాలి.ఆదివాసీ హక్కుల పోరాట సమితి తుడుందెబ్బ జిల్లా ప్రధాన కార్యదర్శి పూర్క చిత్రు, మండల అధ్యక్షులు మడవి కోసేరావ్ డిమాండ్.ఆదిలాబాద్ రిమ్స్‌లోని ఎస్ ఎన్ సియూలో ఏసీ సంబంధిత ప్రమాదంలో ముగ్గురు పసికందులు మృతి చెందిన ఘటన అత్యంత విషాదకరం. ఈ ఘటనలో మృతి చెందిన చిన్నారుల కుటుంబాలను రాష్ట్ర ప్రభుత్వం వెంటనే ఆదుకోవాలని ఆదివాసీ హక్కుల పోరాట సమితి తుడుం దెబ్బ డిమాండ్ చేస్తోంది.ఇంద్రవెల్లి మండలం గిన్నెరా గ్రామానికి చెందిన కుంరం సేకుబాయి–దినేష్ దంపతుల బిడ్డతో పాటు ఉట్నూర్ ఇచ్చోడ ప్రాంతానికి చెందిన చిన్నారులు మృతి చెందినట్లు సమాచారం.ఈ ఘటనకు షార్ట్ సర్క్యూట్ కారణమని చెబుతూ, విచారణ జరుపుతున్నామని అధికారులు మరియు ప్రభుత్వం పేర్కొంటున్నారు. అయితే ఇలాంటి ప్రమాదాలు జరగకముందే ఆసుపత్రుల్లో భద్రతా ప్రమాణాలను పర్యవేక్షించి, ముందస్తు జాగ్రత్తలు తీసుకోవాల్సిన బాధ్యత ప్రభుత్వంపై ఉంది.ఏజెన్సీ ప్రాంతాల్లో గర్భిణులు, చిన్నారులు, సాధారణ ప్రజలు వైద్య సేవల కోసం అనేక ఇబ్బందులు ఎదుర్కొంటున్నారు. గతంలో కూడా వైద్య సదుపాయాల కొరతపై ప్రజలు ఆసుపత్రుల ముందు ధర్నాలు, నిరసనలు నిర్వహించిన సందర్భాలు ఉన్నాయి. అయినప్పటికీ సమస్యలను శాశ్వతంగా పరిష్కరించడంలో ప్రభుత్వం నిర్లక్ష్యంగా వ్యవహరిస్తోందని ప్రజల్లో ఆందోళన ఉంది. ఏజెన్సీ ప్రాంతానికి ప్రధాన వైద్య కేంద్రంగా ఉన్న ఉట్నూర్ ఆసుపత్రిలో పూర్తి స్థాయిలో వైద్యులు, సిబ్బంది, అవసరమైన వైద్య సదుపాయాలు అందుబాటులో ఉండేలా ప్రభుత్వం చర్యలు తీసుకోవాలి. చిన్నచిన్న వైద్య సమస్యలకు కూడా రోగులను ఆదిలాబాద్ రిమ్స్‌కు తరలించాల్సిన పరిస్థితి లేకుండా ఉట్నూర్‌లోనే మెరుగైన వైద్య సేవలు అందించాలి. ఆసుపత్రులు ప్రజల ప్రాణాలను కాపాడే కేంద్రాలుగా ఉండాలి కానీ, భద్రతా లోపాల కారణంగా ప్రాణాలు కోల్పోయే పరిస్థితి రావడం అత్యంత బాధాకరం. ప్రభుత్వ ఆసుపత్రుల్లో విద్యుత్, ఏసీ, అగ్నిమాపక, అత్యవసర భద్రతా వ్యవస్థలను ఎప్పటి కప్పుడు తనిఖీ చేసి,లోపాలు ఉంటే వెంటనే సరిచేయాలి. రిమ్స్‌లో జరిగిన పసికందుల మృతి ఘటనపై సమగ్ర, పారదర్శక విచారణ జరిపి వాస్తవ కారణాలను వెల్లడించాలి. బాధ్యులుగా తేలిన వారిపై తగిన చర్యలు తీసుకోవడంతో పాటు, మృతి చెందిన పసికందుల కుటుంబాలకు ప్రభుత్వం తక్షణ ఆర్థిక సహాయం అందించి, వారికి అండగా నిలవాలి. ఇకపై ఇలాంటి విషాద ఘటనలు పునరావృతం కాకుండా రాష్ట్రంలోని అన్ని ప్రభుత్వ ఆసుపత్రుల్లో భద్రతా ప్రమాణాలను కఠినంగా అమలు చేయాలని ఆదివాసీ హక్కుల పోరాట సమితి తుడుం దెబ్బ ప్రభుత్వాన్ని డిమాండ్ చేస్తోంది.
Reporter
వాస్తవ గమ్యం
మరిన్ని వార్తలు
Developed By :
