వైభవంగా మందమర్రి హరిహర క్షేత్ర గణనాథుడి నిమజ్జనం
రాయపట్నం గోదావరి తీరంలో గంగమ్మ ఒడికి చేరిన లంబోదరుడు
వాస్తవ గమ్యం / తెలంగాణ / మంచిర్యాల : మందమర్రి: స్థానిక ప్రసిద్ధ శ్రీ హరిహర దేవస్థానంలో కొలువుదీరిన గణనాథుడి నిమజ్జనోత్సవం బుధవారం అత్యంత వైభవంగా, భక్తిశ్రద్ధల నడుమ ముగిసింది. నవరాత్రుల సందర్భంగా తొమ్మిది రోజుల పాటు విశేష పూజలు అందుకున్న విఘ్నేశ్వరుడికి ఆలయ కమిటీ సభ్యులు, అర్చకులు శాస్త్రోక్తంగా వీడ్కోలు పూజలు నిర్వహించారు.అనంతరం ఆలయ ప్రాంగణం నుంచి ప్రారంభమైన నిమజ్జన శోభాయాత్ర పట్టణ పురవీధుల్లో కోలాహలంగా సాగింది. స్థానిక మార్కెట్ ఏరియా మీదుగా సాగిన ఈ యాత్రలో భక్తులు భారీ సంఖ్యలో పాల్గొన్నారు. యువకుల నృత్యాలు, డప్పు వాయిద్యాల చప్పుళ్ళు, "గణపతి బప్పా మోరియా.. అగలే బరస్ తూ జల్దీ ఆ" అంటూ భక్తులు చేసిన జయజయధ్వానాలతో మార్కెట్ వీధులన్నీ ఆధ్యాత్మిక శోభను సంతరించుకున్నాయి. మార్గమధ్యంలో స్థానిక వ్యాపారులు, మహిళలు స్వామివారికి హారతులు పట్టి మొక్కులు చెల్లించుకున్నారు.పురవీధుల్లో సాగిన శోభాయాత్ర అనంతరం వినాయక విగ్రహాన్ని రాయపట్నం గోదావరి తీరానికి తరలించారు. అక్కడ ఆలయ కమిటీ సభ్యులు, భక్తుల సమక్షంలో వేదమంత్రోచ్ఛారణల మధ్య గణపయ్యను ఘనంగా నిమజ్జనం చేశారు. ఈ కార్యక్రమంలో ఆలయ ప్రతినిధులు, పట్టణ ప్రముఖులు, పెద్ద సంఖ్యలో భక్తులు పాల్గొన్నారు.
Admin
వాస్తవ గమ్యం
మరిన్ని వార్తలు
Developed By :
