జూనియర్ అథ్లెటిక్స్‌లో రెబ్బెన విద్యార్థి ప్రతిభ
రాష్ట్రస్థాయి పోటీలకు ఊరడి అంజన్న ఎంపిక
వాస్తవ గమ్యం / తెలంగాణ / ఆసిఫాబాద్ : జూనియర్ అథ్లెటిక్స్ ఛాంపియన్‌షిప్‌ సెలక్షన్స్‌లో రెబ్బెన జెడ్పీహెచ్ఎస్ విద్యార్థి ఊరడి అంజన్న ప్రతిభ కనబరిచి రాష్ట్రస్థాయి పోటీలకు ఎంపికయ్యాడు. ఆసిఫాబాద్ జిల్లా కేంద్రంలో ఇటీవల నిర్వహించిన జిల్లాస్థాయి పరుగు పందెం పోటీల్లో పదో తరగతి విద్యార్థి ఊరడి అంజన్న 600 మీటర్ల విభాగంలో ప్రథమ స్థానం సాధించాడు. దీంతో ఈ నెల 26వ తేదీ నుంచి వరంగల్‌లో నిర్వహించనున్న రాష్ట్రస్థాయి జూనియర్ అథ్లెటిక్స్ పోటీలకు ఎంపికయ్యాడు. విద్యార్థి ప్రతిభను జిల్లా విద్యాశాఖ అధికారి సచ్చిదానందచారి, జిల్లా విద్యాశాఖ అధికారులు అభినందించారు. అనంతరం జెడ్పీహెచ్ఎస్ రెబ్బెన పాఠశాల ప్రధానోపాధ్యాయురాలు విజయరాణి ఆధ్వర్యంలో శుక్రవారం అంజన్నను ఘనంగా సన్మానించారు. ఈ సందర్భంగా ప్రధానోపాధ్యాయురాలు మాట్లాడుతూ విద్యార్థులు చదువుతోపాటు క్రీడల్లోనూ రాణించి తమకు ఇష్టమైన రంగంలో ముందుకు సాగాలని అన్నారు. క్రీడల్లో ప్రతిభ కనబరిచే విద్యార్థులకు ఉజ్వల భవిష్యత్తు ఉంటుందని పేర్కొన్నారు. పాఠశాల విద్యార్థి రాష్ట్రస్థాయి పోటీలకు ఎంపిక కావడం పాఠశాలకు గర్వకారణమన్నారు. అంజన్నకు శిక్షణ అందించిన పీడీ సత్యనారాయణను ప్రత్యేకంగా అభినందించారు. కార్యక్రమంలో సీనియర్‌ ఉపాధ్యాయులు మేడి చరణ్‌దాస్‌, దూడ రాజనర్సుబాబు, పాఠశాల సిబ్బంది పాల్గొని విద్యార్థిని అభినందించారు.
Reporter
వాస్తవ గమ్యం
మరిన్ని వార్తలు
Developed By :
