మందమర్రి పీహెచ్‌సీని ఆకస్మికంగా సందర్శించిన జిల్లా వైద్యాధికారి డాక్టర్ నరేందర్ రాథోడ్
వాస్తవ గమ్యం / తెలంగాణ / మంచిర్యాల : మందమర్రి, జూన్ 24: మందమర్రి ప్రాథమిక ఆరోగ్య కేంద్రాన్ని జిల్లా వైద్యాధికారి డాక్టర్ నరేందర్ రాథోడ్ బుధవారం ఆకస్మికంగా సందర్శించారు. ఈ సందర్భంగా ప్రాథమిక ఆరోగ్య కేంద్రంలోని వైద్యులు, వైద్య సిబ్బందితో సమీక్ష సమావేశం నిర్వహించారు.ఈ నెల 28న నిర్వహించనున్న పల్స్ పోలియో కార్యక్రమంపై వైద్య సిబ్బంది, ఆశా ఆరోగ్య కార్యకర్తలకు అవగాహన కల్పించారు. వైద్య, విద్య, మున్సిపల్, ఐసీడీఎస్ తదితర శాఖల సమన్వయంతో పల్స్ పోలియో కార్యక్రమాన్ని విజయవంతం చేయాలని ఆదేశించారు.జిల్లాలోని అన్ని ప్రాథమిక ఆరోగ్య కేంద్రాల వైద్య సిబ్బందికి ఇప్పటికే శిక్షణ అందించామని, పోలియో వ్యాక్సిన్‌ను అన్ని కేంద్రాల్లో అందుబాటులో ఉంచామని తెలిపారు. జిల్లాలో సుమారు 76,367 మంది ఐదేళ్లలోపు చిన్నారులకు పోలియో చుక్కలు వేయనున్నట్లు పేర్కొన్నారు. ఇందుకోసం 459 పల్స్ పోలియో కేంద్రాల ద్వారా సుమారు 1,836 మంది వైద్య సిబ్బందితో కార్యక్రమాన్ని చేపడుతున్నట్లు వెల్లడించారు.ఆశా కార్యకర్తలు తమ పరిధిలోని ఐదేళ్లలోపు పిల్లల వివరాలను సేకరించి, మొదటి రోజే 100 శాతం లక్ష్యాన్ని పూర్తి చేయాలని సూచించారు. మిగిలిపోయిన పిల్లలకు ఈ నెల 29, 30 తేదీల్లో ఇంటింటికీ తిరిగి పోలియో చుక్కలు వేయాలని ఆదేశించారు. అప్పుడే పుట్టిన పిల్లలు, గతంలో వ్యాక్సిన్ తీసుకున్నవారు, జ్వరం, జలుబుతో బాధపడుతున్న పిల్లలు కూడా పోలియో చుక్కలు తీసుకోవచ్చని స్పష్టం చేశారు.అనంతరం జాతీయ ఆరోగ్య కార్యక్రమాలు, అసంక్రమణ వ్యాధుల నిర్వహణ, ఔషధ నిల్వలను పరిశీలించారు. ప్రతి ప్రాథమిక ఆరోగ్య కేంద్రంలో అత్యవసర మందులు అందుబాటులో ఉంచాలని, స్టాక్ రిజిస్టర్లను ఎప్పటికప్పుడు నవీకరించాలని ఆదేశించారు. గడువు ముగిసిన మందులను ప్రత్యేకంగా వేరు చేసి భద్రపరచాలని సూచించారు.అలాగే బీపీ, షుగర్ వంటి అసంక్రమణ వ్యాధులతో బాధపడుతున్న వారిని గుర్తించి వారి వివరాలను పోర్టల్‌లో నమోదు చేయాలని, సమయపాలన పాటిస్తూ ప్రజలకు అందుబాటులో ఉండాలని వైద్య సిబ్బందికి సూచించారు. స్థానిక ప్రజాప్రతినిధులు, స్వచ్ఛంద సంస్థల సహకారంతో మెరుగైన వైద్య సేవలు అందించడంలో ముందుండాలని కోరారు.ఈ కార్యక్రమంలో ప్రోగ్రామ్ ఆఫీసర్ డాక్టర్ సుధాకర్ నాయక్, వైద్యాధికారి డాక్టర్ లక్ష్మీప్రసన్న, జిల్లా మాస్ మీడియా అధికారి బుక్క వెంకటేశ్వర్, ఆశా ఆరోగ్య కార్యకర్తలు, వైద్య సిబ్బంది, పర్యవేక్షకులు, క్షయ వ్యాధి నియంత్రణ కార్యక్రమంలో పాల్గొంటున్న సిబ్బంది పాల్గొన్నారు.
Reporter
వాస్తవ గమ్యం
మరిన్ని వార్తలు
Developed By :
